-this page updated 06sep2010
  
Josie D. Henson
Josefina Dizon Henson

I Josefina Dizon Henson, o “Josie,” karing makakilala metung yang tenakan a Kapampangan na bayit at meragul king Lungsud Angeles. Deng pengari na ila pin di Ines Henson-Dizon ning Lungsud Angeles at Vicente Alvarez Dizon ning Baculud na meging bantug a pintor ning U.P. College of Fine Arts.

Mighayskul king St. Scholastica’s Academy ning San Fernando, Pampanga; at meyari yang kursung Bachelor of Fine Arts, major keng Painting keta kng University of Sto.Tomas banwang 1962. Kayari nang megaral, mekapagobra ya bilang Art Editor ning “The Grade Teacher,” metung a pambangsang magazine para karing talaturung Filipino. Tinuru ya namang Anatomy of the Human Body at Landscape Painting keng lalam ning College of Fine Arts ning University of the East (UERM) bayu ne ayasawa i Dr. Ruben G. Henson, metung a espesyalistang EENT ning Lungsud Angeles.
Atin lang atlung anak a lalaki at metung a anak a babai: di Dr. Raoul D. Henson, metung a Eye M.D., Ramon “Ramsee” D. Henson.” at Dr. Ruben D. Henson III, metung a ENT Specialist, at i Janina Maria.

I Gng. Josie ikwa nang memakyabe karing miyaliwang group shows king Angeles at Menila bayu ya mekapag-one-man show keng Gallery, ning Hyatt Regency Hotel, Menila banwang 1979. Anyang 1983, kinangwa yang atlung duminggung pamagsane ing “Workshop in Watercolor” kayabe ing bantug a American-born Watercolorist, i Dong Kingman. Iti meganap ya keta king Hong Kong at Mainland China. Ketang banwang 1986, makanyan yang pasibayung migsane, mupin keng Pastel Portrait Painting naman kayabe i Daniel Greene ning North Salem, New York. I Gng. Josie ilig na ing magpintang mangalagung lugal, mangalabung at makule sampaga at bungang dutung o prutas keng laru man o akrilik at portraits in oil, pati pastel ketang istudyo na kng Villa Gloria, Angeles City.

Deng pakatuki ila deng dati at kasalungsungan nang kayayaniban at panimunan a aguman keti Kapampangan at keta king lual ning bangsa:

• Chairman of Fiestang Kuliat (1992 and ’93); ketang lalam ning terminu na anyang 1992 karin ya meumpisa ing mumunang diling Kapampangan Food Festival at ing Tigtigan-Terakan Keng Dalan nung nu keti la mibalak map at meumpisang meganap.
• Dating Presidenti, Metro Angeles Toastmaster’s Club
• Dating Area-2 Governor, Toastmasters International District 75-Philippines
• Presidenti, Akademyang Kapampangan (1994 to 2005);
• Miembru, United Poets Laureate International
• Board of Trustee of Kuliat Foundation and Museo Ning Angeles (1999-2005)
• Presidenti, DILA (Defenders of the Indigenous Languages of the Archipelago) (2002-2010).
• March 2005 metanggap ya bilang bukud tanging miyembrung Filipinu ketang Rotary Club ning eClub One, na pakabase kng District 5450, Colorado, USA kayabe deng 40 miembru (Australia, USA, Canada, Italy, Germany, Switzerland, Japan, Qatar etc. Metung ya iting “cyber club” at deng miyembru misasabi la at mikakit keng Internet. Ing Presidenti nang iTim Mowbray makabase ya king Estados Unidos.
• Mituldwan ya bilang metung karing 8 Directors ning eClub One ning Rotary Year 2007-2008.
• Keng kilub na ning apulung banwa, penimunan ne ing “Gumulis Tamu,” metung a banwaan a Summer Art Workshop para karing anak idad 5 anggang 16 ning Museo Ning Angeles.

Source: Librung "Kasapunggul a Sampaga II" (editor ANP Renato Bonus Alzadon, Parnasong Kapampangan, 2010)
MIABE-ABE ....AGYU TAMU
nang Josie D. Henson

Iting milyari kanaku / e ku man tinap-tinapan
Akung meging pamuntuk ning / Akademyang Kapampangan
Uling ketang yalal dala / ring opisyal ning Aguman
E na cu man mekatagun / keng mesabing kapulungan.
Dapot inyang pigtapat da / ing bina ra kung kailangan
Ginalang ku't layun tinggap / ing binie rang katungkulan. 

Makanyan man, titimplan ke / ining kanakung sarili
Nung agyu kung agampanan / pamamuntukan kaniti
Igiu kung migmikelangan / inyang kaku ra sinabi:
"Ding pundador ning aguman / pawa la ngang onorabli"
Pero nga ku keng sarili: nung ing makataya keni
Ing Arte ampon cultura / e na cu man binang tawli.

Ing ilig kung binye ning Dios / king pinsil ampon pintura
Inua sa't king bie ning pintor / mabibye cung maligaya
Pablasang ing kakung pinsil / papalto na ing legwan na
Ning sari-saring larawan / a makawili keng mata
At karing larawan a ren / maka sulat kang poema
Uling atin lang mensahing / maliari mung a-istorya.

Anti mo ing larawan ning kasilip-silip ayaldo
Asabi mung ing katayan / anti mu nang ababalyo
Anti naman ing menukup / a panaun banda babo
Mgamu, magpaldas yang yatu / keng krisis at alingongo
Pota namang pipinta mu / itang ambun ketang lirio
Ita, ya ing primavera / a ume nang magparayo.

Nanu man ing gugulis kung / eksena ampon senaryu
Ipatungkul ku king balen / at lakwas king Apung Ginu
Uling ing Dios at ing balen / pigkalam dang binye kaku
Iting regalu ning belwan / a inaus kung "ilig ku"
At nung ing ilig kung iti / at tungkulan a binye yu
Wari't ating pami-ugne / asabi kung "agyu tamu"

Miabe-abe.... agyu tamu / arinan tayang dangalan
Ing kekatamung Aguman: Akademyang Kapampangan
Myuman dinan tayang bagyus / ban akwa neng sulapawan
Ing palsintan tamung Balen / a pagnasan tang aranan
Ing ipanulid ta kaya / ing Himno ning Kapampangan
Kambe ning Arte't Kultura / ampon ing Amanung Siswan.
   
Source: http://maxpages.com/poecia